Часопіс "Спутник и Погром", слаўны імперскімі поглядамі, надрукаваў цэлую "працу" па знявазе подзвігу войска ВКЛ у славутай Аршанскай бітве 1514 года. Пры гэтым шавіністы прызнаюць, што ў сучаснай Беларусі дастаткова людзей, якія шануюць вайсковыя подзвігі менавіта сваіх продкаў, а не перамогі чужога народа ў захопніцкіх войнах, у тым ліку і супраць Беларусі. Варта адзначыць, што вышэйзгаданыя "даследчыкі" не прызнаюць самастойнага існавання беларускай і ўкраінскай нацый і часта называюць іх дзяржаўнасць "часовай". Прыводзім урывак шавіністычнага артыкулу.
"У 2014-м годзе адзначаўся асаблівы юбілей. 500 гадоў таму, 8 верасня 1514 г польска-літоўская армія разбіла рускую армію пад Оршай (сёння - Віцебская вобласць, Беларусь ("Спутник и Погром" прынцыпова піша "Белоруссия" - заўв.Orsha.eu). Што ж тады здарылася, каго гэта хвалюе і што гэта ўсё значыць? Паспрабуем разабрацца. Яшчэ не датыкаючыся да ўласна гістарычных падзей, становіцца ясна, што мае месца нейкая асаблівая сітуацыя: цэлыя ЧАТЫРЫ краіны прэтэндуюць на ролю "галоўнага пераможца маскалёў" (Польшча, Літва, Беларусь, Украіна). Беларусь жа і зусім лічыць Бітву пад Оршай слаўнай перамогай свядомай зброі і падмуркам сваёй нацыянальнасці - прыкладна, як гэта ва ўкраінцаў з Канатопам. Дастаткова сказаць, што ў 1992 годзе беларускія афіцэры прымалі прысягу менавіта ў гадавіну гэтай бітвы (хоць адзначаць гэтае "свята" пачалі яшчэ пры СССР). Гэта, дарэчы, істотна мяняе вобраз "братэрскай" Беларусі, якую нам ставілі ў прыклад у якасці "нармальнай Украіны". Нацыянальная міфалогія свядомых беларусаў нічым не адрозніваецца ад той салянкі, якую прапануюць свайму народу украінцы, а менавіта - вайна з маскалямі да пераможнага канца..."
Варта адзначыць, што аднаго з аўтараў дадзенага выдання - Кірыла Авяр’янава-Мінскага, паводле ягоных жа словаў, пазбавілі беларускага грамадзянства. У сваіх артыкулах ён праводзіць ідэю, што беларусы — штучная нацыя са штучнай культурай і мовай, памылкова адарваная ад "рускага свету". Таксама публіцыст не аднойчы называў Аляксандра Лукашэнку "здраднікам інтарэсаў Расеі". А галоўны рэдактар "С і П" Ягор Прасвірнін не так даўно ў лепшых традыцыях расейскага імперыялізму заклікаў Расею аднавіць "вялікую краіну" шляхам заваявання Беларусі, а таксама Ўкраіны і Казахстана.
Але барацьба з беларускай нацыянальнай думкай, якая шануе абарончую вайсковую адвагу нашага народа, трывае не толькі ў інтэрнэце і на старонках шавіністычных выданняў. Летась на вуліцах горада людзям неаднаразова раздаваліся сцягі Расеі, іх дагэтуль яшчэ можна пабачыць у некаторых маршрутных таксі Оршы.
