У школе № 19 (гімназія № 1) здарыўся інцыдэнт на выбарчым участку. Участак № 26 яшчэ да адкрыцця датэрміновага галасавання 8-га кастрычніка, якое павінна было пачацца а 10:00, адзначыўся парушэннем, на якое звярнуі ўвагу назіральнікі. У сваім кабінеце, які знаходзіцца непасрэдна на выбарчым участку, знаходзілася загадчыца гаспадаркай, хаця выбарчы кодэкс не дапускае знаходжання пабочных асобаў у месцы для галасавання. Пасля скаргі сітуацыя палепшылася. Пасля абеду пабочных асобаў на ўчастку ўжо не было, незадаволенасць назіральнікаў была прынята камісіяй да ведама.
Участак у школе № 19 мае свае асаблівасці. Дзверы, якія вядуць на яго і апячатваюцца ў канцы кожнага дня, не адзіныя. Унутры знаходзіцца яшчэ некалькі кабінетаў, у тым ліку школьных класаў. Пасля зваротаў назіральнікаў да выбарчай камісіі, вучні былі пераведзеныя на ўрокі ў іншыя памяшканні, каб не замінаць выбарчаму працэсу. Сітуацыя выправілася і ў гэтым.
