Сусветная дэкларацыя правоў чалавека была прынятая ў 1948 годзе. Далучылася да яе прыняцьця і Рэспубліка Беларусь. Пра тое, як адлюстраваныя ў беларускай Канстытуцыі і нашым заканадаўстве палажэнні гэтай сусветнай дэкларацыі, ішла гутарка на круглым стале, які адбыўся ў сераду 9 снежня.
Арганізавалі мерапрыемства праваабарончыя арганізацыі. Іх прадстаўнікі распавялі прысутным гісторыю прыняцця дакумента, яго асноўныя палажэнні. Потым гаворка пайшла пра тое, як палажэнні Дэкларацыі супадаюць з беларускай Канстытуцыяй. І як высветлілася, па шэрагу пытанняў супадзення няма. Напрыклад, Дэкларацыя гарантуе грамадзянам права на жыццё, а Канстытуцыя Беларусі ўтрымлівае палажэнне аб дапушчальнасці смяротнага пакарання ў нашай краіне.
Але значна часцей сустракаюцца выпадкі, калі палажэнні, прапісаныя і замацаваныя ў Канстытуцыі, на практыцы амаль немагчыма рэалізаваць. Напрыклад, Канстытуцыя гарантуе свабоду масавых вулічных акцый, але рэальна ў Оршы, напрыклад, атрымаць дазвол на іх правядзенне цалкам немагчыма.
Абмеркаванне паказала, што ад прыняцця дэкларацыі да рэальнага ўвасаблення ў жыццё яе палажэнняў можа прайсці даволі працяглы час.
