Аршанскі "Сяргееў В" і ў гэтым сезоне не здолее выйграць Віцебскую абласную непрафесійную баскетбольную лігу. Штогод каманда ўваходзіць у спіс шукальнікаў галоўнай узнагароды, аднак сілы заваяваць яе аршанцам не хапае. Вось і на гэты раз аршанцы правалілі канцоўку рэгулярнага чэмпіянату, апусціўшыся на 4-е месца. У паўфінале "сяргееўцам" дастаўся віцебскі клуб "БЛ Груп". Аршанцы прайгралі першы матч у Віцебску, а паколькі серыя доўжыцца да дзвюх перамог, то матч у Оршы мог стаць апошнім, калі б "Сяргееў В" прайграў.
На вялікі жаль, так і сталася. Другі матч серыі прайшоў у Оршы на паркеце спарткомлекса "Лакаматыў". Перавага "БЛ Груп" адчулася ледзь не з самых першых хвілінаў. Аршанцы ж праявілі сябе лепш за суперніка толькі ў чацвёртай чвэрці, якую, дарэчы, і выйгралі 29:21. Але агульны лік быў не на карысць "Сяргеева В" — 91:101.
У выніку аршанскі клуб выбывае з барацьбы за трафей і пазмагаецца толькі за бронзавыя медалі з "Трыумфам".
Сяргееў В — БЛ Груп — 91:101 (25-34, 16-23, 21-23, 29-21).
