Шосты міжнародны байк-фестываль "Контрудар" адбудзецца ў вёсцы Студзёнка Сенненскага раёну каля возера Бярозаўскае. Фестываль будзе прысвечаны 75-годдзю буйной танкавай бітвы пад Сянно падчас Другой Сусветнай вайны. Выступаць на ім будуць папулярныя гурты і выканаўцы: SunЛайт (Магілёў), Ворона (Менск), Скандал (Наваполацк), АриНа Радио (Орша), СамПроцесс (Менск), Punkrot (Менск), Five`o`clock (Віцебск), Чип и Дейл (Менск), Неизвестный маршрут (Менск), Steel Razor (Менск), Сага Ветров (Віцебск), Eisenwut (Масква), BEDLAM [444], BTR, "Чёрный обелиск" (Масква). Фэст праводзіцца ў тры дні: 8, 9 і 10 ліпеня.
Беларускія "Начныя ваўкі" - беларускі аддзел скандальнага расейскага мотаклуба, які адкрыта падтрымлівае прэзідэнта Расеі Уладзіміра Пуціна, расейскую агрэсію ва Украіне і прытрымліваецца ідэяў "рускага свету" - шавіністычнай ідэалогіі, накіраванай на ўсталяванне прарасейскіх рэжымаў у краінах альбо ваенную экспансію ў краіны, урады якіх не лічацца сябрамі Крамля. Многія беларускія байкеры не маюць ніякага дачынення да "Беларускіх начных ваўкоў", бо лічаць, што байкерскі клуб не можа адназначна падтрымліваць нейкую палітычную сілу, якая існуе за кошт дзяржаўнага бюджэту Расеі, бо сам па сабе рух байкераў нясе свабоду, ён не палітызаваны. Нягледзячы на сваю яўна антыамерыканскую і ў цэлым антызаходнюю рыторыку ў выступах, "Начныя ваўкі" ў асобах арганізатараў фэсту ўжываюць выраз "фуд-корт", што з'яўляецца яўным амерыканізмам. І гэта толькі адзін з прыкладаў.
Бітва пад Сянно (Лепельскі контрудар) - наступ войска Чырвонай Арміі на пазіцыі нямецкага вермахту. Адбываўся з 6 па 10 ліпеня 1941 года і з'яўляўся часткай Віцебскага супрацьстаяння. Савецкі контрудар скончыўся няўдачай. Скаваўшы дзеянні савецкіх войскаў, нямецкі 39-й мотокорпус фарсіраваў 8 ліпеня Заходнюю Дзвіну трыма дывізіямі ў раёне Улы. 9 ліпеня 20-я танкавая дывізія 39-га мотокорпуса 3-й танкавай групы Гота ўварвалася ў Віцебск. Фактычна "Начныя ваўкі", якія на словах шануюць перамогу СССР у Другой Сусветнай вайне, адзначаюць контрудар, які скончыўся няўдачай Чырвонай арміі. Хіба ў вайне не было бітваў, у якіх перамагалі савецкія байцы?
