У зводцы УУС за 20 верасня паведамлялася, што ў ноч з 9-га на 10-е верасня на чыгунцы ў Аршанскім раёне выявілі крадзёж двух дроссель-трансфарматараў на суму 2.385 рублёў. Як стала вядома нашаму сайту, апошнім часам гэтыя крадзяжы сталі даволі рэгулярнай з'явай на чыгунцы каля Оршы. Так, на чыгуначным прыпынку Гараднянскі дроссель-трансфарматары кралі, прынамсі, тройчы. Прычына крадзяжу відавочная - у гэтай прыладзе маецца не малая колькасць медзі.

Ахова чыгункі, нават, выстаўляла на Гараднянскім засаду, каб злавіць не надта арыгінальнага злачынцу, але наступны крадзёж дроссель-трансфарматара адбыўся тады калі засаду знялі не спадзяючыся на яе поспех.

І, вось, зусім нядаўна падазраваны быў выяўлены - ім аказаўся малады 21-гадовы хлопец, які працаваў у адным з падраздзяленняў чыгункі. Затрыманне яго адбылося проста на працы.

Цяпер хлопцу пагражае не малое пакаранне, бо ягоная прага нажывы прывяла да вялікіх стратаў. Справа ў тым, што медзі ў кожным трансфарматары можна знайсці, прыблізна, на 2 кілаграмы, а вось, кошт яго ў працоўным стане ды з усталёўкай цягне на суму роўную амаль 1.500 даляраў. Дадаць да гэтага кампенсацыю затрымкі цягнікоў і атрымліваецца не малая сума, якая толькі ўзмацняе віну падазраванага.