У пачатку 90-х гадоў пытанне пра вяртанне спрадвечных назваў вуліцаў і населеных пунктаў, якія ў свой час перайменавалі бальшавікі, стаяла востра. Тады пры шматлікіх выканкамах і грамадскіх арганізацыях (у прыватнасці, пры "Таварыстве беларускай мовы") ствараліся адмысловыя тапанімічныя камісіі, якія павінны былі шукаць першапачатковыя назвы, прапагандаваць іх вяртанне і непасрэдна займацца падрыхтоўкай гэтых зменаў. Ствараліся нават цэлыя праграмы па перайменаванні. І гэтыя камісіі мелі поспехі. Але праз пэўны час дзяржава прыняла савецкае мінулае за аснову сваёй ідэалогіі, і пытанне тапанімікі стала неактуальным. Тапанімічныя камісіі перасталі збірацца нават там, дзе яны існавалі.

Зноў актуалізавалася пытанне пра тапанімічную работу падчас круглага стала на тэму тапанімікі. Нагадаем, тады ён праводзіўся з нагоды так званага "упарадкавання назваў вуліцаў", якая прайшла ў гэтым годзе ў Оршы і ў выніку якой былі дапушчаны шматлікія памылкі. Вёў той круглы стол, пэўна, найлепшы спецыяліст па аршанскай тапаніміцы Алесь Шутаў. Па выніках і было прапанавана, каб прадухіліць памылкі ў будучым, аднавіць работу камісіі хаця б пры грамадскай арганізацыі ТБМ.

У нядзелю 9 кастрычніка адбыўся ўстаноўчы сход тапанімічнай камісіі пры аршанскім ТБМ. На жаль, прайшоў гэты сход ужо без Алеся Шутава. Старшынём камісіі, які павінен будзе выконваць арганізацыйныя функцыі, абраны Віталь Паўлаў. У планах камісіі актуалізаваць у грамадстве пытанне аднаўлення старадаўніх назваў вуліцаў і стварыць паўнавартасную праграму па паступовым вяртанні назваў, якая зможа запрацаваць у будучым.