Вядомы аршанскі праваабаронца, кіраўнік прафсаюзу металістаў Васіль Леўчанкаў пачуў страшны дыягназ ад дактароў: рак лёгкіх. Ён перанёс ужо тры аперацыі, аднак неабходны яшчэ адзін курс лячэння. Патрэбна правесці 4 хіміятэрапіі, кожная з якіх каштуе каля 2 тысяч еўра. Усіх, хто можа фінансава дапамагчы знанаму грамадскаму дзеячу, праваабаронцу Васілю Леўчанкаву, просяць звяртацца па мабільным нумары: 712-57-55 (Васіль Ціханавіч Бераснеў).
Васіль Леўчанкаў працаваў па размеркаванні інжынерам на прадпрыемстве "Тэхніка сувязі". У пачатку 90-х далучыўся да рабочага руху, стаўшы сакратаром бараньскага стачкома. Адзін з тых, хто вёў людзей на блакаду чыгункі з Барані. Пазней узначаліў свабодныя прафсаюзы ў Оршы. Некаторы час узначальваў свабодны прафсаюз металістаў на "Тэхніцы сувязі" і рэспубліканскую арганізацыю. Пасля ліквідацыі прафсаюза заняўся правабарончай дзейнасцю, супрацоўнічаў з праваабарончым цэнтрам "Вясна": аказваў дапамогу па юрыдычных пытаннях людзям, якія патрапілі ў бяду і не маглі дазволіць сабе платную кансультацыю.
