Многія жыхары вёскі Руміна Аршанскага раёна апынуліся ў пэўнай ізаляцыі ад цывілізацыі. Да Воршы адсюль менш за 10 кіламетраў, аднак не варта забываць — большасць мясцовых жыхароў пенсіянеры. Вяскоўцы ўжо некалькі гадоў вядуць актыўнае ліставанне з Бабініцкім сельсаветам і Аршанскім райвыканкамам з просьбай давесці да Руміна аўтобусны маршрут і правесці ў сярэдзіну вёскі калонку з вадой. Чыноўнікі толькі прысылаюць адпіскі і спасылаюцца на нормы. Праблемы жыхароў вёскі Руміна прагучалі ў рэпартажы на "Радыё Рацыя".

Пакуль жыхары Руміна вымушаныя хадзіць на аўтобусны прыпынак у вёску Панізоўе.

У сваіх лістах чыноўнікі Аршанскага райвыканкама паведамляюць, што ў цэлым Руміне няма дзе абсталяваць прыпынак. Акрамя таго, кажуць, што істотна ўзрасце кіламетраж і кошт праезду. Пенсіянеры, якім на лячэнне трэба выбірацца ў Воршу ў бальніцу ільнокамбіната, просяць чыноўнікаў зрабіць маршрут з заездам у Руміна хаця б 1-2 разы на тыдзень. Акрамя таго, вяскоўцы просяць абсталяваць нармальную калонку для вады, каб не ездзіць далёка за ёй па дарозе, па якой сноўдаюць машыны. Сітуацыя яшчэ больш ускладняецца ў восеньска-зімовы перыяд, калі дарога зледзянелая, у снезе, у брудзе. Жыхары Руміна распавядаюць, як пэўны час пілі ваду для кароў, яна была аднолькавай для фермы і для жыхароў вёскі. І толькі пасля скаргі санітарнаму ўрачу жыхарам далі іншую ваду. Пенсіянерам даволі цяжка ісці за вадой у непагадзь.

Падрабязнасці сітуацыі ў вёсцы Руміна і фотаздымкі адтуль можна ўбачыць на сайце "Радыё Рацыя".