На штогадовае жалобнае мерапрыемства сабралося каля 30 чалавек. Акрамя аршанскіх грамадскіх актывістаў, прысутнічалі і маладыя людзі, якія ўпершыню пабывалі на гэтым месцы, а з Мінску для ўдзелу ва ўшанаванні памяці прыехаў адзін з лідараў руху салідарнасці "Разам" Алесь Макаеў. Выказацца мог кожны ахвотны: чыталі вершы, распавядалі гісторыю Сталінскіх рэпрэсіяў ды гісторыі канкрэтных людзей (амаль у кожнай беларускай сям'і ёсць нехта хто пацярпеў ад тых рэпрэсіяў) пацярпелых ад пераследу ў 30-я гады. Мінскі госць Алесь Макаеў параўнаў камуністычны рэжым з фашысцкім і адзначыў важнасць таго, каб камуністы "селі на лаву падсудных Нюрнбергскага працэсу разам са сваімі саюзнікамі па 1939 годзе - нацыстамі".

Грамадскі актывіст Ігар Казмерчак, звярнуў увагу прысутных на тое, што за гэты год на месцы памяці з'явіўся яшчэ адзін надмагільны крыж з указаннем імя, прозвішча і датаў жыцця аднаго з загінулых у віхуры рэпрэсіяў. І заклікаў ставіць такія крыжы з імёнамі канкрэтных людзей пацярпелых ад рук савецкіх карнікаў па ўсім урочышчы - на могілках павінны стаяць помнікі кожнаму пахаванаму.

Алена Кучынская, якая прынесла кветкі да помніка рэпрэсаваным зачытала прысутным свой верш з наступнымі радкамі:

Ў душы не будзе чысціны

Ва ўлады пешчанай ў крыві,

А толькі жорсткасць і падман.

На кожнага ёсць свой наган.