Сустрэча са школьным знаёмцам класіка беларускай літаратуры Ўладзіміра Караткевіча Ўладзімірам Шафранскім прайшла ў музэі Караткевіча 24 лістапада, напярэдадні чарговай гадавіны з дня народзін нашага славутага земляка.
Бацька Ўладзіміра Караткевіча Сямён і бацька Ўладзіміра Шафранскага Пётр у 30-я гады працавалі ў адной аршанскай банкаўскай установе. Будынак установы захаваўся, там цяпер месціцца “Аграпромбанк”.
Яны ня проста працавалі побач, яны абодва любілі спяваць. Ва ўстанове быў свой хор. На рэпетыцыі хора абодва бацькі бралі сваіх сыноў. Вось так і пазнаёміліся Валодзя Караткевіч і амаль на чатырнаццаць месяцаў маладзейшы за яго Валодзя Шафранскі.
Пасля вайны Валодзі ізноў сталі часта бачыцца. Цяпер яны разам вучыліся ў аршанскай сярэдняй школе №1: Караткевіч на клас старэй. Але абодва наведвалі цудоўны драмгурток, які апякала настаўніца рускай літаратуры Кацярына Грыневіч. Караткевіч там сябе спрабаваў і на сцэне і ў рэжысуры, Шафранскі – толькі на сцэне.
У спектаклі “Ревизор” Валодзя-старэйшы граў Гараднічага, Валодзя-малодшы – Хлестакова. Пасля спектакля, ўдзельнікі сабрался разам у адной са школьных аўдыторыяў, каб сфоткацца. На выніковым фатаздымку, Шафранскі – трэці злева, Караткевіч – у самым версе, а Кацярына Грыневіч – па цэнтру.
Шчэ яднаў Валодзей гурток спеваў, якім кіраваў настаўнік Жалязняк. Любоў да спеваў, закладзеную бацькамі, яны пранеслі праз усё жыццё, а Ўладзімір Пятровіч і цяпер мае глыбокі нізкі голас і файна спявае, нават, без музычнага суправаджэння. Што і рабіў, апроч успамінаў пра мінулае.
У школе №1 Караткевіч увайшоў у канфлікт з настаўнікам матэматыкі і апошні школьны год вучыўся ўжо ў школе №5, за Дняпром. А сям’ю Шафранскіх наведваў шчэ раз студэнтам Кіеўскага ўнівера, калі завітаў у Воршу на канікулы. Сярод іншага распавядаў пра ўкраінскі нацыяналізм, ды што тут, на радзіме, неяк больш утульна.
Прайдуць гады і пісьменнік Караткевіч прыйдзе да цвёрдага пераканання, што нацыянальная годнасць каштуе ўтульнасці і стане апосталам беларускага аптымізма. У тым ліку і пад уплывам сяброў-украінцаў.
