Білетны касір і пасажыры цягніка рэгіянальных ліній эканом-класа Орша – Віцебск заўважылі падазроны скрутак, пакінуты без догляду. Супрацоўнікі органаў унутраных спраў атрымалі паведамленне пра магчымую “бомбу” і адправіліся высвятляць, што здарылася. На станцыі Сасноўка састаў быў спынены, на станцыю прыехалі ўсе экстрэнныя службы.
На месца прыбылі супрацоўнікі сапёрна-піратэхнічнай групы вайсковай часці 5524. Яны ўбачылі на месцы звычайную мэблевую паліцу, абгорнутую паперай і перавязаную скотчам, піша “Жыццё Прыдвіння”. Як высветлілася, паліца належала жанчыне, якая выйшла ў касу набыць квіток, але жанчына затрымалася і не паспела ў вагон. У выніку паліца адправілася ў “самастойнае падарожжа”, напалохала грамадзян і затрымала цягнік.
