Кінастужка "Тайна бутэлек Вайнберга" - плод доўгай працы рэжысёра Эдуарда Навагонскага над гісторыяй Аршанскага піўзавода, адкрытага яшчэ ў 1883 годзе. І, у прыватнасці, сям'і Вайнбергаў, якая гэтым піўзаводам спачатку валодала. Беніямін Янкалевіч і Сора Беркаўна Вайнбергі ажаніліся ў 1871 годзе ў Дзвінску (цяпер - Даўгаўпілс, Латвія), а затым пераехалі ў Оршу. На першых бутэльках, якіх звязваюць з гісторыяй піўзавода, сустракаюцца ініцыялы - БВЯ, што адпавядае ініцыялам Вайнберга. А юрыдычным гаспадаром піўзавода была ягоная жонка.
У фільме здымаецца ўнук аўтара Эдуарда Навагонскага. Ім удалося звязацца з праўнучкай Вайнбергаў, якая падзялілася архіўнымі дакументамі, адкуль сталі вядомыя некаторыя факты біяграфіі. Але ў цэлым, у гісторыі сям'і Вайнбергаў і ў першых гадах Аршанскага піўзавода яшчэ вельмі шмат прагалаў, якія належыць запоўніць інфармацыяй.
