Чаму мы яго ўвогуле ўзгадваем? У ХVI стагоддзі Ворша жыла па юліянскім календары. Цяпер па юліянскім календары ў Воршы жыве толькі праваслаўная царква, і па яе календары наша 25 студзеня – гэта 12 студзеня. А значыць, чарговыя ўгодкі падзеі.
12-м студзеня 1579 года пазначаны дакумент, у якім берасцейскаму яўрэю Айзіку Якубовічу пацверджваліся правы на мыта каморы Аршанскай. Якубовіч узяў у арэнду мытныя і піцейныя зборы нашага горада. Збор мыта з транзіту чужакоў і іх тавараў праз Воршу прыносіў выключна здабыткі, а вось з піцейных збораў (падаткі з корчмаў) Якубовіч займеў, апроч грошай, пэўныя непрыемнасці з аршанскімі грамадзянамі. Яны яго і білі і рабавалі. Ды Якубовіч не зламаўся. Ён заручыўся падтрымкаю караля Стэфана Баторыя і паспяхова працягнуў сваю небяспечную працоўную дзейнасць.
Першыя дакументальныя ўзгадкі пра яўрэяў у Оршы адносяцца да карчмара Шчаснага і 1560 года. Але тое ліпеньская гісторыя.
Ну а Паўла і Леаніда Якубовічаў з медыясучаснасці мы і так ведаем. І пра іх цяпер ня буду.
Андрэй Мельнікаў
