Лісты з патрабаваннямі выплаціць падатак на дармаедства рассылаюцца па ўсёй прасторы роднай Беларусі. Часта здараецца і такое, што лісты прыходзяць людзям, якія ніякім чынам не могуць быць дармаедамі паводле Дэкрэта № 3. Некалькі дзён таму наш сайт публікаваў размову з музыкам Уладзіславам Лепяшынскім - яго, студэнта чацвёртага курсу, запісалі ў дармаеды і вымагалі выплаціць падатак. Музыка замест заняткаў творчасцю і сваёй вучобай быў вымушаны траціць свой час на падатковую інспекцыю і даказваць там яе ж памылкі.
Цяпер у падобнай сітуацыі апынулася малады спецыяліст Вікторыя Бурдэнка. Яна скончыла Віцебскі дзяржаўны ўніверсітэт ім.Машэрава, бюджэтнае аддзяленне дзённай формы навучання ў чэрвені 2016 года, а са жніўня ўжо выйшла на працу па размеркаванні ў адзін з дзіцячых садкоў. Дзяўчына ніяк не павінна трапляць пад дзеяння Дэкрэта № 3, бо дармаедам не з'яўляецца, працуе і лічыцца маладым спецыялістам. Але цяпер чарговаму чалавеку даводзіцца даказваць падатковай інспекцыі, выказваючыся слэнгам, што ён не "вярблюд". У чым тады сэнс збору падатку, калі вялікія бюджэтныя грошы былі патрачаныя на сотні памылковых лістоў?
