Галоўныя трэнеры "Оршы" і пінскай "Хвалі" распавялі пра старт турніру, свае адчуванні ад першай гульні. Нагадаем, пінская "Хваля" здабыла выязную перамогу над аршанцамі з лікам 1:0 дзякуючы аўтаголу Яўгена Пракопчыка на 57-й хвіліне. Галоўны трэнер пінскай "Хвалі" Сяргей Шульжык адзначыў, што перамагла каманда, якая больш гэтага хацела:

Наша гульня нічым не адрознівалася ад гульні суперніка. Мы хацелі выплюхнуць эмоцыі, якія назапасіліся ў ходзе перадсезоннай падрыхтоўкі. Лічу, што ў сённяшнім матчы хто хацеў больш выйграць, той і выйграў.

Рулявы аршанцаў Юрый Канаплёў паведаміў, што яго камандзе крыўдна прайграць такім чынам. Ён адзначыў, што адна з прычынаў паразы - згулянасць гульцоў, гэты фактар лепш працуе ў "Хвалі", бо ў "Оршы" з мінулага году ў асноўным складзе засталіся толькі 4 футбалісты.

Крыўдна прайграваць такія матчы. Адкрыццё чэмпіянату было. Мы мелі шмат момантаў, асабліва ў першым тайме. Такія моманты трэба рэалізоўваць, тады будзе лягчэй гуляць. А тут гэты казус здарыўся - наш гулец зрэзаў мяч у сваю браму. А мы шмат такіх перадач нарабілі, і ўсё недакладна. Думаю, больш-менш справядліва было б, калі б мы згулялі ўнічыю. Але трэба аддаць належнае гасцям: "Хваля" - нядрэнная каманда. Відаць, што згуляная, не адзін год разам, у адрозненне ад нас. У параўнанні з мінулым годам у "Оршы" з асноўнага складу чатыры чалавекі засталося. Па сутнасці, зноўку каманда лепіцца. Будзем праз гульні разумецца, каб дамагчыся выніку.