Кабыляцкая гара вядомая як месца масавых растрэлаў часоў Сталінскіх рэпрэсій - тут па розных ацэнках камуністы растралялі ад 300 да 3.000 чалавек. Але паўнавартасных археалагічных даследванняў, каб удакладніць гэтую лічбу ніколі не праводзілася. Фашысты не рэдка карысталіся тымі ж месцамі, што і камуністы для растрэлаў сваіх ахвяраў. Кабылякі - не выключэнне. Літаральна за кіламетар-паўтара ад месца растрэлаў НКУС былі знойдзены і растрэлы часоў Другой сусветнай вайны вайны. Зараз месца растрэлаў пазначана невялікім помнікам.
Паўнавартасных раскопак на гэтым месцы таксама не было, але гэтай вясной тут папрацавалі "чорныя капацелі". Вакол крыжа, які пастаўлены ў памяць аб ахвярах фашызму, на тэрыторыі не больш чым 50 квадратных метраў можна пабачыць, як мінімум, 12 характэрных ямаў. Відавочна, што ямы былі зроблены гэтай вясной. Падобныя месцы масавых пахаванняў ахоўваюцца дзяржавай, але з-за аддаленасці - помнік знаходзіцца ў лесе - праваахоўнікі не спраўляюцца з гэтай задачай.
