Вось ужо больш за два тыдні не вядуцца работы па руйнаванні гістарычных будынкаў Аршанскага бровара, заснаванага яшчэ ў далёкім 1883 годзе. У канцы траўня на тэрыторыі збанкрутавалага ў 2006 годзе прадпрыемства з’явілася тэхніка, якая пачала зносіць будынкі старога піўзавода. Нават з’явілася інфармацыя, якую нідзе афіцыйна не пацвердзілі, што тэрыторыя “зачышчаецца” пад будучы гандлёвы цэнтр. Аднак у акрузе гандлёвых цэнтраў і без таго ўдосталь — хаця б тыя ж “Орша Сіці” і “Цэнтрум”. Чуткі як распаўсюдзіліся, так і зніклі. А пакуль сітуацыя выглядае так — цяжкой тэхнікі на тэрыторыі колішняга піўзавода няма, руйнаванне прыпынена. І аршанцы яшчэ могуць глядзець на будынкі з 135-гадовай гісторыяй. Пакуль складана прадказаць сітуацыю, ці будынкі дажываюць свае апошнія дні, ці ўсё ж для іх падрыхтаванае абнаўленне і новае жыццё.
Пакуль яны завалены смеццем і хламам, аднак захоўваюць гісторыю аршанскага броварства. Пра аднаўленне піўной галіны ў Оршы размовы не вяліся даўно.
