У ноч з 5 на 6 ліпеня каля горада Дзісна ў Мёрскім раёне беларускімі памежнікамі была затрымана група кантрабандыстаў. Мужчыны 1969 і 1971 года нараджэння з Оршы, Полацка і Смалявічаў спрабавалі пераправіць цыгарэты з Беларусі ў Латвію на... мотадэльтапланах і з дапамогай іншых прыстасаванняў і прылад. Лятальныя апараты планавалася накіраваць з Мёршчыны ў Краслаўскі край Латвіі, аб гэтым памежнікі дазналіся, убачыўшы такі маршрут у навігатарах дэльтапланаў. Зламыснікі збіраліся выкарыстаць для ўзлёту закінутую ўзлётна-пасадачную паласу сельгасавіяцыі, яны нават прывезлі на месца прычэп-кемпінг. Але планы кантрабандыстаў былі выкрытыя, паведамляе сайт Дзяржпагранкамітэту Беларусі.
Перасекчы дзяржаўную мяжу і накіраваць мотадэльтапланы з цыгарэтамі ў Рабежніекі беларусам не ўдалося. У іх канфіскаваны два мотадэльтапланы тыпу "Фрэгат", два мікраааўтобусы, адзін легкавік, прычэп-кемпінг, тры партатыўныя радыёстанцыі, лётны рыштунак і 160 000 штук цыгарэт маркі "Прэм'ер". Зараз высвятляецца, хто яшчэ ўваходзіў у групу кантрабандыстаў.
