6-га ліпеня "Орша" здзейсніла тое, чаго даўно хацелі заўзятары ў нашым горадзе - клуб выйшаў у 1/8 фіналу Кубка краіны. Здарылася гэта дзякуючы перамозе над мазырскай "Славіяй" (асноўны і дадатковы час 1:1, пенальці 4:3 на карысць аршанцаў). У 1/8 фіналу аршанцы ў любым выпадку павінны былі сустрэцца з камандай Вышэйшае лігі, бо сталі адзінай дружынай з ніжэйшых ліг, якая прабілася на гэту стадыю.

Функцыянеру Беларускай федэрацыі футбола Сяргею Вітушку дапамагаў у правядзенні лёсавання вядомы поп-выканаўца Саша Нема. У супернікі "Оршы" быў вызначаны фіналіст мінулага розыгрышу салігорскі "Шахцёр", які лідзіруе ў чэмпіянаце краіны на дадзены момант. Лёс не аказаўся міласцівым да "сіня-белых", апанент на стадыі вельмі моцны. Але гэтая стадыя Кубка складаецца ўсяго з аднаго матчу і ў чвэрцьфінал пройдзе пераможца, а ў адным матчы, пры належнай настройцы на яго, адбыцца можа што заўгодна. Безумоўным фаварытам пары з'яўляецца "Шахцёр", аднак заўсёды ёсць месца для сюрпрызаў.

Астатнія пары 1/8 фіналу: Дынама Бр — Гомель, БАТЭ — Тарпеда-БелАЗ, Нёман — Мінск, Віцебск — Слуцк, Дынама Мн — Дняпро, Іслач — Гарадзея, Нафтан — Крумкачы. У пары "Шахцёр" — "Орша" гаспадаром поля будзе "Шахцёр", матч адбудзецца ў Салігорску 22 альбо 23 ліпеня.

Гульня стане адной з найважнейшых і найбольш статусных для "Оршы" за апошнія гады. Звычайна ў іншых гарадах на падобныя гульні кіраўніцтва арганізоўвае аўтобус для ўсіх жадаючых падтрымаць свой клуб. Магчыма, кіраўніцтва Оршы вылучыць аўтобус для прыхільнікаў клуба, якія жадаюць з'ездзіць на матч у Салігорск.