Дзень Беларускай вайсковай славы традыцыйна адзначаецца 8 верасня. У гэты дзень у 1514 годзе на Кравінескім полі адбылася адна з найбольш значных Бітваў у гісторыі Еўропы - Бітва пад Оршай. У выніку Бітвы наша дзяржава здолела спыніць усходняга агрэсара, які мог яе цалкам знішчыць.

Традыцыйна 8 верасня ў розных гарадах краіны адбываюцца грамадскія і культурніцкія мерапрыемствы. У 90-я гады мінулага стагоддзя многія мерапрыемствы 8 верасня мелі палітычны налёт які нечакана вярнуўся ў 2017 годзе. Так, у Мінску ў Дзень вайсковай славы акрамя культурніцкіх мерапрыемстваў, пройдуць і дзве палітычныя акцыі.

Так, Кансерватыўна-Хрысціянская партыя БНФ (кіраўнік Зянон Пазняк) правядзе 8 верасня дазволеную вулічную акцыю ў Кіеўскім скверы Мінскукаля кінатэатру "Кіеў". Распачнецца мерапрыемства а 18-00 і плануецца, што працягнецца да 20-30. Пад час мітынгу арганізатары плануюць абмеркаваць з прысутнымі магчымасць абароны Беларусі ад меркаванай расійскай акупацыі пасля сканчэння вучэнняў "Захад-2017". Пры гэтым, выступаць удзельнікі будуць у фармаце "адкрыты мікрафон".

Другая акцыя не дазволена ўладамі, на яе заклікае Беларускі нацыянальны кангрэс, сябры якога ўжо даўно і не запытваюць ва ўладаў дазволу на акцыі. Акцыя распачнецца вечарам 8 верасня на Кастрычніцкай плошчы і таксама будзе накіравана на абарону краіны. У прыватнасці, арганізатары плануюць, што любы ахвотны на Кастычніцкай плошчы зможа прыняць прысягу на вернасць Радзіме.