10 снежня адзначаецца Міжнародны дзень правоў чалавека. У гэты дзень у 1948 годзе на Генэральнай Асамблеі ААН была прынятая Усеагульная дэкларацыя правоў чалавека. Гэты дакумент перакладзены на больш чым 370 моваў і дыялектаў свету. Дэкларацыю падпісалі ўсе чальцы Арганізацыі аб’яднаных нацый. Гэта – 192 краіны.
Зараз беларускія праваабаронцы ў сваіх штогадовых справаздачах аб стане правоў чалавека ў нашай краіне паведамляюць пра шэраг парушэнняў, наступу на чалавечыя правы з боку беларускіх уладаў. У пачатку 90-х гадоў у Горках на вуліцы выйшлі студэнты сельскагаспадарчай акадэміі. У Горках, ды і па ўсёй БССР быў дэфіцыт, прадукты выдаваліся па талонах. І калі мясцовыя студэнты выжывалі за кошт падсобных гаспадарак бацькоў, паведамляюць horki.info, дык замежным студэнтам не было адкуль прасіць дапамогі. Грошай і тым больш харчавання дастаць было цяжка.
Іншаземныя студэнты сабраліся каля фантана ля корпуса № 10 і пачалі выкрыкваць патрабаванні забяспечыць крамы прадуктамі. Фатограф Аляксандр Храмко зняў на свой здымач афрыканскага студэнта, які трымаў у руках кнігу "Правы чалавека". Гэты ўнікальны здымак з галодных апошніх месяцаў Савецкага Саюзу публікуецца ў інтэрнэце ўпершыню.
Незадаволенасць студэнтаў змусіла рэктара склікаць экстраннае пасяджэнне вакол сітуацыі. На яго былі запрошаныя і іншаземныя студэнты. Праблема вырашылася - адмыслова, каб супакоіць замежнікаў, горацкія крамы забяспечылі прадуктамі і напружанасць сунялася. Сам фатограф Аляксандр Храмко тады якраз вучыўся ў сельскагаспадарчай акадэміі. Ён распавядае, што вучыўся на курсе са студэнтамі з Афрыкі, Амерыкі і краін Карыбскага басейну. У прыватнасці, сярод пратэстоўцаў былі студэнты з Нікарагуа, Мадагаскару, Конга і Балівіі. У студэнта (на фатаграфіі) аўтар папрасіў кнігу, каб пагартаць яе старонкі, але яму хутка сказалі, што кнігу яму ніхто не дасць. Вось так замежныя студэнты, стаміўшыся ад савецкага дэфіцыту, выйшлі на варту сваіх правоў і дамагліся поспеху.
