Унікальны выпадак адбыўся на ўчастку для галасавання ў СШ №5 - амаль да гадзіны ночы назіральнікі і сябры камісіі не маглі пакінуць участак для галасавання, бо так загадала дырэктарка школы.

Пад час падліку галасоў старшыня выбарчай камісіі, яна ж дырэктар школы №5 Наталля Вайцэховіч вызначыла месца для назіральнікаў не бліжэй чым за 6 метраў ад стала дзе падлічвалі бюлетэні. Зразумела з такой адлегласці нічога не было бачна, пра што назіральнікі склалі адразу дзве скаргі. Рэакцыя на скаргі ў Вайцэховіч была рэзкая, усім прысутным (сябры камісіі і назіральнікі) яна заявіла, што калі падалі скаргі, то ніхто не пакіне памяшканне ўчастку пакуль яна не дасць адказ, або, як варыянт, назіральнікі адклічуць скаргу і прынясуць ёй выбачэнне. Назіральнікі не сталі ні выбачацца, ні адклікаць скаргу і ў выніку ўсе прысутныя сядзелі на ўчастку да глыбокай ночы. У 12-20 адзін з назіральнікаў (давераная асоба кандыдата ў дэпутаты) пазваніў у свой выбарчы штаб і распавёў праблему. Да школы прыехалі назіральнікі з іншых участкаў, якія праз вокны школы пачалі спрабаваць рабіць фота і відэа фіксацыю канфлікта. На гэта Вайцэховіч загадала закрыць усе праходы да школы. У выніку, каб пакінуць участак назіральнікі былі вымушаныя звярнуцца ў міліцыю з заявай, што іх незаконна пазбаўляюць свабоды. Толькі дзякуючы прыехаўшаму нараду міліцыі назіральнікі былі вызваленыя.