Нагадаем, што 25 сакавіка раніцай ў Дуброўна былі затрыманыя двое сябраў Аб'яднанай грамадзянскай партыі. Па-сутнасці, як і ў іншых рэгіёнах, іх затрымлівалі, каб не дапусціць паездкі ў Мінск на дадзволены канцэрт - таму цягнулі час (Міхаіла Чэмурака дапытвалі каля 6 гадзін), а Наталлю Стрэльчанка абвінавацілі ў непадпарадкаванні міліцыі і больш за суткі яна правяла ў аршанскім ІЧУ.

Фармальнай прычынай для затрымання стала заява былога намесніка старшыні мясцовага выканкаму Кір'янава. Ён звярнуўся ў міліцыю з заявай, што ў сацыяльных сетках на яго распаўсюджвалася "Клевета". Праўда, з гэтай заявай не ўсё зразумела. Так, пададзена яна была вечарам 24 чысла (у суботу) і, як трэба, была зарэгістравана ў міліцэйскай кнізе ў якой рэгіструюцца ўсе заявы. А наступны запіс у той жа кнізе ўжо тычыцца ранішняга затрымання Стрэльчанка. То бок, паводле гэтай кнігі, ў ноч з суботы на нядзелю ў Дубровенскае РАУС не паступіла аніводнай іншай заявы ні па тэлефоне, ні ў пісьмовым выглядзе. Спакойна, значыцца, ў Дуброўна ў ноч паміж выходнымі акрамя "Клеветы" няма ў райцэнтры аніякіх іншых правапарушэнняў.

І, вось, Наталля Стрэльчанка атрымала ліст, што ў дачыненні да яе адміністратыўная справа па заяве Кір'янава закрыта. Заява, выкарыстаная для двух затрыманняў актывістаў, атрымалася больш не патрэбнай.