“Віцебскаўтадар” абвясціў тэндэр на абследаванне пабудаванага ў 1957 годзе моста праз Дняпро ў Аршанскім раёне. Мост даўжынёй 193,97 метра знаходзіцца на пад'ездзе да Оршы ад трасы М8/Е95. Абследаванне павінна прайсці з 2 ліпеня да 28 верасня. Пры гэтым адмыслоўцы кампаніі, якая яго выйграе, павінны ўсталяваць стан моста, у прыватнасці - рэшткавую таўшчыню металаэлементаў у прыапорнай зоне талежалезабетоннага пралётнага збудавання і трывальныя характарыстыкі бетону ў канструкцыях моста.
Арыенціровачны кошт работ па абследаванню моста праз Дняпро складае 25 000 рублёў. Фінансавацца работы будуць з дзяржаўнага мэтавага бюджэтнага фонду.
У Беларусі апошнім часам былі прызнаныя аварыйнымі некалькі мастоў. Напрыклад, трэснуў мост праз Прыпяць у раёне Жыткавічаў, а замест яго ўладкована часовая пераправа. Таксама мост на пуцеправодзе над чыгункай трэснуў недалёка ад Лунінца. Акрамя гэтага, закрыты рух праз мост у Чашніках і абмежаваны рух цяжкіх аўтамабіляў на мосце ў Наваполацку.
