У адказ на наш матэр'ял пра тое як пенсіянер пайшоў за прышчэпкам і трое сутак праседзеў у міліцыі, абласное упраўленне міліцыі выдала сваю версію падзеяў. Тэкставага тлумачэння падзеяў пакуль не з'явілася, але на сваім ю-туб канале міліцыя размесціла нарэзку відэа-запісу з нагруднай камеры аднаго з міліцыянтаў. Відэа прадстаўлена не цалкам, а ўжо ў змантаваным выглядзе.
На відэа-запісе бачна, як мужчына пераходзіць дарогу па вуліцы Молакава ад паліклінікі на іншы бок. Далей ідзе размова з мужчынам каля крамы "Мясны фаварыт" у якой чуецца, як пенсіянер адмаўляецца сядаць у машыну супрацоўнікаў міліцыі. Але прызнае, што ён перайшоў дарогу ў неналежным месцы. Моманта калі мужчыне стала кепска на відэа няма. Пры гэтым, міліцыянты вядуць сябе даволі ветліва. Ці прымянялі супрацоўнікі міліцыі фізічную сілу да пенсіянера (у выглядзе падножкі) на відэа таксама не зафіксавана. Пры гэтым, супрацоўніца хуткай дапамогі выказвае (што чутна на відэа) версію, што затрыманы "рісуется".
Нагадаем, што ў выніку дадзенага інцыдэнту пенсіянер трое сутак адседзеў у міліцыі, а суд над ім так і не адбыўся.
