Абодва выпадкі былі выяўлены ў канцы чэрвеня. У хуткую дапамогу звярнуўся мужчына, які скардзіўся на тэмпературу. Мужчыну даставілі ў бальніцу Сямашка, але тады ніхто не падумаў пра гэты небяспечны дыягназ. Таму аніякіх адмысловых мераў перасцярогі не было прынята. Толькі пазней дактары зразумелі, што гаворка ідзе пра адзёр. Але ў той час ужо заразілася яшчэ і супрацоўніца бальніцы - адна з санітарак.

Па нашай інфармацыі, якая пакуль не была падцверджана афіцыйна, мужчына не так даўно быў у Расіі і мог прывезці хваробу адтуль. Бо ў Беларусі сітуацыя з адзёрам да гэтага году была стабільная - для нашай краіны гэта была рэдкая хвароба. Праблема з'явілася ў сувязі з нестабільнай сітуацыяй з медычным абслугоўваннем у суседняй Украіне. Сёння там дзяржава не можа забяспечыць поўную вакцынацыю ад адзёру і хвароба пачала распаўсюджвацца ў гэтай краіне, а адтуль і ў іншых. У нашых паўднёвых суседзяў выяўлена ад пачатку года больш за 23.000 выпадкаў хваробы, ад якой памерла ўжо 12 чалавек. Таксама выпадкі хваробы выяўляліся ў некаторых заходніх краінах: Францыі, Грэцыі, Італіі, Сербіі і Румыніі.

У Беларусі адзіночныя выпадкі гэтай заразнай хваробы былі выяўлены ад пачатку года ва ўсіх абласцях краіны. Нядаўна выпадак адзёру быў выяўлены і ў Магілёве.

Мужчыну на дадзены момант перавялі з аршанскай бальніцы ў Віцебск, а многія аддзяленні бальніцы падвергнуты дэзынфекцыі.