Тое чым займаецца Ігар Станкевіч - стварэннем свайго радаводу - называецца генеалогіяй і лічыцца дапаможнай гістарычнай навукай. Бо праз лёс канкрэтнай сям'і можна лепш зразумець агульныя гістарычныя працэсы. Калі б не канкрэтныя людзі і сем'і з іх лёсамі, то гісторыя была б навукай падубнай толькі на статыстыку з лічбамі і датамі за якімі не бачныя жыцці.
На сустрэчу з Ігарам Станкевічам сабраліся не толькі проста цікаўныя, былі і тыя хто сам спрабуе вывучаць свой радавод. Былі, дарэчы, і некалькі прадстаўнікоў тых самых Кменскіх. Каменскія шляхотны род, шмат хто з гэтага роду непасрэдна звязаныя з Аршаншчынай, хаця, як гэта не рэдка бывае, рэалізавацца як мастакі, дзяржаўныя дзеячы і г.д. змаглі больш у іншых краях. Што ж характэрнага для ўсёй краіны можна пабачыць у радаводзе Кменскіх. Напрыклад, як шляхта была вымушана падцверджваць свае прывілеі пасля далучэння Усходняй Беларусі да Расейскай імперыі. У Беларусі на той момант каля 12% насельніцтва мела шляхецтва (больш з Еўрапейскіх краінаў шляхты было толькі ў Гішпаніі). І ўсім ім даволося звяртацца ў суды, каб даказаць, што яны атрымлівалі калісці статус шляхты. Сёння гэтыя звароты - каштоўная крыніца інфармацыі для генеолагаў. Паказальна як лёс раздзяляў сем'і пад час Першай Сусветнай вайны і рэвалюцыяў і імперыі. Нехта змог з'ехаць у Польшу, нехта застаўся тут - лёс раскідваў тады шмат якія аршанскія сем'і. Значна пацярпеў род Каменскіх у часы Сталінскіх рэпрэсій - пра гэты перыяд Ігар Станкевіч распавядаў шмат, бо займаецца грамадскай ініцыятывай "Растраляныя ў Оршы", якая аб'ядноўвае нашчадкаў ахвяраў рэпрэсіяў.
Пакуль прэзентуемая кніга зроблена невялікім накладам, але ў хуткім часе будзе даступная для бясплатнага скачвання ў сеціве.
