Сёння (30 жніўня) працягнулася судовае паседжанне па справе фаната ФК "Орша" Аляксея Сукорскага, якога раней затрымалі з нашыўкамі аббрэвіятураў, якія маюць абразлівыя для міліцыі расшыфроўкі. Прынамсі, так на гэтыя аббрэвіятуры паглядзела міліцыя. Аршанскія супрацоўнкі ГУБОП (аддзел міліцыі па барацьбе з арганізаванай злачыннасцю) звярнуліся ў суд з хадайніцтвам, каб гэтыя аббрэвіятуры былі прызнаныя экстрэмісцкімі. Гэта яны падмацавалі меркаваннем эксперта, які сёння сам прыехаў і выступіў у судзе. Было даволі прадказальна, што суд падтрымае меркаванне экспертаў і міліцыянтаў. Бо ў параўнанні з імі меркаванне Аляксея выглядала не настолькі аўтарытэтным.
Так і атрымалася. Суд прызнаў адпаведнае спалучэнне літар Л.О.С.Н кірыліцай і B.A.A.C лацінкай (адмыслова публікуем іх у няправільным парадку) экстрэмістскім матэр'ялам. Цяпер выкарыстанне гэтых аббрэвіятураў будзе лічыцца заклікам да сацыяльнай варожасці па ўсёй краіне, а тыя хто будуць мець гэтыя літары на любых носьбітах (сцягі, нашыўкі, татуіроўкі і г.д.) могуць быць прыцягнуты да адказнасці.
Пры гэтым пры ўсім, самога Аляксея прыцягнуць да адказнасці, здавалася б, не магчыма, бо ён выкарыстоўваў іх да таго як іх прызналі экстрэмістскімі. Здавалася б, справа спынілася і выходзіць на новы ўзровень. Але ж не, Аляксея так проста не адпусцілі. Пасля суду прадстаўнік міліцыі, які прысутнічаў на судзе папрасіў яго затрымацца, каб вырашыць некаторыя пытанні з яго тэлефонам (тэлефон Аляксею пасля зўатрымання так і не вярнулі - адправілі на экспертызу ў пошуках экстрэмізму). Той пачакаў, а пазней паведаміў нам, што яго з міліцыі павезлі дамоў для правядзення вобшуку. То бок, міліцыя, маючы пастанову суда, будзе шукаць новыя аббрэвіятуры, якія маглі б лічыцца экстрэмістскімі матэр'яламі.
На момант публікацыі артыкула вобшук працягваецца. Мы адсочваем сітуацыю. Дарэчы, хадайніцтва Аляксея пра тое, каб суд быў адкрытым двойчы не было задаволена - судовае паседжанне прайшло ў закрытым рэжыме.
