У вёсцы Антавіль 23 красавіка невядомы выставіў вакно ў доме і скраў рыбалоўную вуду ды два слоікі варэння. Пра гэта паведаміў гаспадар дому пенсіянер 1954 года нараджэння. Праз кароткі час злачынца быў знойдзены і арыштаваны, ім аказаўся мясцовы жыхар 1974 года нараджэння.
Яшчэ адзін дробны крадзёж адбыўся ў раёне Усходняя горада Орша. У мясцовага пенсіянера невядомы скраў тачку, якую той выкарыстоўваў для гаспадарчых патрэбаў. Справа была перададзена ўчастковаму Мікалаю Карчаўцу. Спачатку ўчастковы знайшоў саму тачку, якую злачынца ўжо паспеў прадаць. А новы гаспадар гаспадарчай прылады распавёў у каго і як яе набыў. У выніку злачынца знойдзены, ім аказаўся раней судзімы мясцовы жыхар. Злачынца ўжо паспеў грошы атрыманыя за продаж тачкі банальна прапіць.
Пацярпелы - Георгій Лісоўскі накіраваў у міліцыю падзяку.
Фота і інфармацыя паводле сайту абласнога ўпраўлення МУС.
