У кастрычніку аршанцы чыталі і абмяркоўвалі два трагічныя здарэні на дарогах. Абедзьве буйнейшыя трагедыі кастрычніка здарыліся ў межах горада. На павароце з праспекта Тэстыльшчыкаў маршрутка насмерць збіла жанчыну, а на Горацкай аўтамабіль збіў маці і дзіця.
Калумніст Аляксандр Абуховіч ў сваёй калонцы для "Белгазеты" напісаў, што дзяржава выдаткавала 250 тысяч даляраў толькі за наданне знешняга выгляду "Тэхніцы сувязі". Тады, пасля чарговага скандальнага візіту Лукашэнкі ў Оршу і Барань прыслалі шмат работнікаў з іншых гарадоў на дапамогу. Аднак гэта ў выніку датычылася толькі касметычных зменаў, на самых прадпрыемствах пакуль нічога кардынальна новага не адбылося, каб аднавіць іх нармальную дзейнасць.
"Ваеннае становішча", якое па словах Лукашэнкі было ўведзена ў Оршы, дала пэўныя вынікі на вуліцы Магілёўскай. Праўда, як гэта можа рэанімаваць працоўны рынак Аршаншчыны, прадпрыемствы рэгіёна, — ад улады ніхто ўцямнага адказу не дачакаўся.
У кастрычніку высветлілася, што найміт Аляксандр Ступніцкі з Оршы, які ваяваў за марыянеткавыя прарасейскія сілы на ўсходзе Украіны, жывы. Больш за тое, ён зрабіў сабе новыя дакументы. А расследванне журналістаў высветліла, што ў Ступніцкага ёсць "заступнікі" ў МУС. А рэпартаж выдання "Донбасс. Реалии" паказаў, што беларуская міліцыя не надта турбуе тых, хто ваяваў за Расею, але сем'і баевікоў усё адно панічна баяцца, што іх сваякоў у хуткім часе пасадзяць.
Былы кіраўнік Аршанскага райвыканкама Мікалай Лісоўскі ў кастрычніку быў уладкаваны ў лагістычны цэнтр "Брэміна-Орша". Дакладная пасада Лісоўскага з-за закрытасці беларускіх чыноўнікаў так і не высветлілася, усё толькі на ўзроўні плётак, тым не менш, гэтае прызначэнне выклікала шэраг каментароў на нашым сайце.
У гэтым месяцы працягнулася далейшая камерцыялізацыя выканкама, а таксама быў прааналізаваны бюджэт Аршанскага раёна і прынцыпы яго функцыянавання. Паралельна адбылася яшчэ адна падзея, звязаная з галіной фінансаў. Аршанец Васіль Мацюшэўскі ўзначаліў буйны банк БелВЭБ.
Жыхары Багушэўска стыхійнай акцыяй пратэсту дабіліся, каб чыноўнікі з імі гаварылі. Пытанне датычылася мясцовых бальніцы і паліклінікі. У Оршы ўзнікла крама "Mini-Max" замест "Пасада". Замест аддзела статус нашай мясцовай міліцыі падняўся да ўпраўлення ўнутраных спраў, а начальнікам Аршанскай міліцыі стаў палкоўнік Сяргей Барвянкоў.
У кастрычніку стаў зразумелым лёс "Дома Караткевіча". Яго выкупіў уласнік крамаў "5 элемент" Андрэй Балабін.
