Пра тое, што ўраджэнец Оршы, а цяпер уладальнік гандлёвай сеткі "5 элемент" Андрэй Балабін выкупіў яшчэ адзін дом на вуліцы Караткевіча паведаміла газета "Наша Ніва". Нагадаем, што ў мінулым годзе стала вядома, што адзіны захаваўшыся дом у якім у Оршы жыў Караткевіч плануюць прадаць пад знос. Гэта выклікала вялікі рэзананс. У выніку доўгіх перамоваў, умяшання выканакамаўскіх работнікаў і грамадскіх актывістаў, дом быў выкуплены Андрэем Балабіным для рамонту і далейшай перадачы яго музейнаму комплексу.

У сярэдзіне студзеня Балабін выкупіў яшчэ і дом №8 па вуліцы Караткевіча. Па інфармацыі "Нашай Нівы", абодва дамы будуць аб'яднаныя ў адзін музей Караткевіча. Дом № 8 не мае культурніцкай каштоўнасці і можа быць пераабсталяваны і перабудаваны - у ім і размесціцца асноўная частка экспазіцыі, а Дом Караткевіча стане асноўным экспанатам гэтага музея.

У выніку Орша можа атрымаць не толькі новы музей свайго земляка, але цэлы комплекс і, нават, вуліцу цікавую для турыстаў, бо на тэрыторыі былога піўзавода па той жа вуліцы Караткевіча плануецца адкрыццё вялікай колькасці кавярняў ды іншых установаў для адпачынку.

Сам жа бізнэсмэн пакуль адмовіўся ад каментароў, спаслаўшыся на тое, што праэкт яшчэ не дапрацаваны да канца.