Звычайна сезон пошукаў людзей па лясах у МНС і міліцыі пачынаецца пазней - калі ў лесе з'яўляюцца грыбы і ягады і, адпаведна, людзей становіцца ў лесе больш. Але малады чалавек у Круглянскім раёне ў гэтым годзе зрабіў сапраўдны фальстарт заблукаўшы ўжо 20 сакавіка. 21-гадовы маладзён разам з сябрамі адпачываў на аграсядзібе ў вёсцы Грыбіна, але калі ўся кампанія паехала дамоў, ён чамусці адмовіўся ехаць разам з усімі і пайшоў пешкам.
Пешкам ён пайшоў праз даволі небяспечны балоцісты лес. Калі хлопец зразумеў, што сам ён дарогу ўжо не знойдзе, - да таго ж згубіў у лесе акуляры - то пазваніў сваёй маці. Званок прагучаў амаль а 3 гадзіне ночы. Маці адразу ж перадала інфармацыю ў мясцовы РАУС і пачаліся пошукі. На мабільнік хлопец больш не адказваў.
Толькі раніцай а 9-30 міліцыянты змаглі знайсці хлопца за 5 кіламетраў ад вёскі з якой ён выйшаў. Ісці ён сам ужо не мог, што, магчыма, і ўратавала маладзёну жыццё, бо знайшлі яго каля балота дзе хлопец мог проста патануць. Акрамя стомы ў яго назіралася яшчэ моцнае пераахалоджванне. Да машыны хуткай дапамогі міліцыянты неслі пацярпелага на руках паўтара кіламетры. А медыкі накіравалі хлопца ў бальніцу.
Люся
[ Комментарий был заблокирован, в связи с нарушением норм сообщества ]