31 сакавіка ў 8.00 у Менску і Берасці адкрыліся ўчасткі па выбарах прэзідэнта Украіны. Як паведамілі ва ўкраінскім пасольстве, грамадзяне Украіны, якія жывуць у Менску, Менскай, Магілёўскай, Гомельскай і Віцебскай абласцях, могуць прагаласаваць у беларускай сталіцы па адрасе: вуліца Старавіленская, 51.
Жыхары Берасцейскай і Гарадзенскай абласцей могуць прыйсці для галасавання на выбарчы ўчастак у Берасці, які размешчаны на вуліцы Вароўскага, 19. Абодва ўчасткі будуць працаваць да 20.00. Нагадаем, што ў мінулую ноч Украіна і Беларусь зраўняліся па часе.
Паводле разлікаў украінскага ЦВК, у выбарах прэзідэнта Украіны могуць узяць удзел амаль 12 тысяч суайчыннікаў, якія жывуць у Беларусі. Арыенціровачная колькасць выбаршчыкаў — 6.961 на выбарчым участку ў пасольстве Украіны ў Менску і 4.940 — у генеральным консульстве ў Берасці, БелаПАН спасылаецца на дадзеныя ўкраінскіх дыпламатаў.
У спіс выбаршчыкаў на выбарчых участках у Рэспубліцы Беларусь ўключаны грамадзяне Украіны, якім споўнілася або на дзень галасавання споўніцца 18 гадоў і якія па сваёй выбарчай адрасе паводле дадзеных Дзяржаўнага рэестра выбаршчыкаў адносяцца да гэтых замежных выбарчых участкаў. Кожны грамадзянін Украіны можа праверыць сваё ўключэнне ў рэестр і свае асабістыя дадзеныя з дапамогай онлайн сэрвісу «Асабісты кабінет выбаршчыка» на старонцы «Дзяржаўны рэестр выбаршчыкаў (drv.gov.ua). Асобы, якія не унесеныя ў спіс выбаршчыкаў на выбарчых участках у Рэспубліцы Беларусь, не змогуць прагаласаваць на гэтых участках.
На пасаду прэзідэнта Украіны прэтэндуюць 39 кандыдатаў. Паводле звестак апошніх сацыялагічных апытанняў, сярод лідэраў прэзідэнцкай гонкі папулярны акцёр-комік Уладзімір Зяленскі, дзейны прэзідэнт Украіны прадпрымальнік Пятро Парашэнка і былы прэм’ер-міністр Юлія Цімашэнка.
Адкрыццё галасавання ў Менску прайшло з удзелам пасла Украіны ў Беларусі Ігара Кізіма (другі справа) і ўрачыстым выкананнем гімна Украіны. Фота пасольства Украіны ў Рэспубліцы Беларусь.
