Беларусь, Спорт

"Орша" вылецела з Кубка

26.05.2014 11:36

3244 прагляду, 1 каментар

Футбольны клуб "Орша" развітаўся з Кубкам Беларусі

У матчы папярэдняга раўнду "сіня-белыя" гулялі ў гасцях з "Горкамі". Горацкая каманда выступае ў чэмпіянаце Магілёўскай вобласці, а ў розыгрыш Кубка краіны яна трапіла дзякуючы перамозе ў Кубку Магілёўскай вобласці. Старт гульні быў няўдалым для гасцей - аршанцы прапусцілі ўжо на 9-й хвіліне. Наладзіць камбінацыйную гульню ў нашага клуба не выходзіла, горацкія футбалісты ў большасці адзінаборстваў мелі перавагу. У канцы першай паловы сустрэчы "Горкі" падвоілі лік - абаронца "Оршы" на роўным месцы памыліўся і сваім бяздзеяннем падараваў мяч суперніку ў лічаных метрах ад брамы - гулец "Горак" Бубелеў гэткім падарункам скарыстаўся - 2:0. Другую палову сустрэчы "Орша" распачала куды лепш, часцей атакавала і мела рэальныя магчымасці для ўзяцця брамы. Аднойчы мяч нават трапіў у штангу. На 61-й хвіліне аршанцы дамагліся поспеху - гол забіў Ламака. На большае аршанцы аказаліся няздольныя, xаця мелі некалькі добрых момантаў, аднойчы форвард "Оршы" не рэалізаваў выхад сам-насам з брамнікам гаспадароў. У выніку - параза "Оршы" 1:2 і вылет з Кубка.