На тэлеканале "Белсат" выйшла 4-я серыя дакументальнага цыклу Вячаслава Ракіцкага "Даты праўды", у якім ідзе расповед пра сапраўдны стан рэчаў падчас ІІ Сусветнай вайны, распавядаецца, як Масква спрабавала навязаць і такі навязала людзям міф пра "Вялікую Айчынную вайну", якая ў сапраўднасці не была настолькі адназначнай, як падавалася ў савецкіх падручніках. У беларусаў была боязь і адначасова нянавісць не толькі да нямецкіх акупантаў, але і да Савецкага Саюза, яго карных органаў і палітычнага ладу. У чарговай серыі "Як партызанілі ў БССР" распавядаецца дух партызанскага руху ў Беларусі. Аўтары фільму ставяць пад вялікі сумнеў савецкую "мантру" аб тым, што менавіта дзеянні партызанаў унеслі вырашальны ўнёсак у перамогу СССР над нацысцкай Нямеччынай.
Акрамя таго, звернутая ўвага на беларускія вёскі, знішчаныя савецкімі партызанамі. Паводле падлікаў Анатоля Тараса, такіх у краіне больш за 30. Але савецкая, а цяпер і афіцыёзная беларуская часоў Лукашэнкі прапаганда рабіла ўсё, каб маўчаць пра крывавыя факты. А яны сведчаць канкрэтна і з доказамі: беларускія вёскі спальвалі, нярэдка з жыхарамі, не толькі нацысты, але і савецкія атрады. Акрамя таго, у савецкі перыяд штогод рабілася ўсё больш прыпісак у сапраўдную статыстыку стратаў немцаў падчас вайны. Так, у заслугу "атраду дзядзькі Косці" на чале з Канстанцінам Заслонавым ставілі 96 знішчаных за 3 месяцы эшалонаў. Даследчык Анатоль Тарас, спасылаючыся на рапарт самога Заслонава, кажа, што ў сапраўднасці атрад Заслонава знішчаў 6 нямецкіх эшалонаў. Савецкія прапагандысцкія лічбы не вытрымліваюць ніякай крытыкі — не магло быць такога, каб заслонаўцы знішчалі ў сярэднім крыху больш за эшалон штодня! Тым больш, калі б гэта было, дык куды глядзела Гестапа ці СД? І падобныя прыпіскі рабіліся да большасці партызанскіх атрадаў. Міфы СССР жывуць у афіцыйнай гісторыяграфіі і да сёння.
Пра Заслонава з пазнакі 18:40.
