«Брэміно груп» адкрыла буйны транспартна-лагістычны цэнтр побач з пунктам пропуску «Бераставіца» на беларуска-польскай мяжы. «Брэміна-Бераставіца» ўключае складскі корпус плошчай больш за 5 тыс. кв.м, адміністрацыйна-бытавы комплекс на больш чым 2,3 тыс. кв.м, стаянкі для легкавога і грузавога аўтатранспарту, два кантрольна-прапускныя пункты і будынак інжынернага забеспячэння плошчай 7 тыс. кв.м. «Брэміна-Бераставіца» непасрэдна прымыкае да пункта пропуску. Вылучана асобная паласа руху транспарту, які накіроўваецца ў ТЛЦ, ёсць магчымасць перагрузіць, размеркаваць, апрацаваць і захоўваць тавар на складзе.

Агульны аб'ём інвестыцый на будаўніцтва цэнтра склаў больш за 25 млн рублёў. Да канца 2020 года на "Брэміна-Бераставіцы" плануецца арганізаваць больш за 110 працоўных месцаў. Варта адзначыць, што ў канцы 2016 года "Брэміна груп" адкрыла каля пункта пропуску "Брузгі" падобны цэнтр. Там планавалася афармляць да 800-900 грузавых аўтамабіляў у месяц, але цяпер ён абслугоўвае каля дзвюх тысяч. Праект ТЛЦ "Брэміна-Бераставіца" першапачаткова разлічаны на такія аб'ёмы.

Фота: «Гродзенская праўда»

Аднак гэтымі аб'ектамі планы «Брэміна груп» на Гарадзенскую вобласць не абмяжоўваюцца. «Цяпер адкрыты аўтамабільны тэрмінал, у сферы інтарэсаў і чыгуначны транспарт», - адзначыў старшыня агульнага сходу ўдзельнікаў «Брэміна Груп» Аляксандр Зайцаў. Зараз выбіраецца пляцоўка для стварэння чыгуначнага тэрмінала побач з польскай мяжой. Інвестыцыйны дагавор плануюць падпісаць у 2020 годзе.