Неяк так склалася, што дзеячы беларускай культуры з заходніх абласцей краіны нячастыя госці ў Оршы. Тым больш цікава, што ў гэтую пятніцу ў Оршу завітаюць адразу два вельмі цікавыя чалавекі.

Адзін з іх Яраслаў Іванюк — гэта польскі беларус з Падляшскага ваяводства, ці як у нас гавораць, з Падляшша. У першая палове 20-га стагоддзя бальшавікі даволі адвольна праводзілі межы паміж краінамі як унутры СССР, так і на міжнародным узроўні. Так і атрымалася, што некалькі соцень тысяч беларусаў без усялякай эміграцыі апынуліся ў іншай дзяржаве — у Польшы. Хаця працэс асіміляцыі адбываецца несупынна — моладзь ўсё больш пераходзіць на польскую мову і колькасць беларусаў на Падляшшы змяньшаецца, але і сёння беларуская культурна-адукацыйная інфраструктура на ўсходзе Польшы развіта, здаецца, больш чым у самой Беларусі. Яраслаў Іванюк — тыповы беларус, які ўжо некалькі пакаленняў жыве ў польскім беларускім асяродку. У 2000 годзе Яраслаў заняўся стварэннем беларускай электроннай бібліятэкі — на той момант цалкам унікальная справа. І вось ужо 20 год ягоны сайт «Камунікат» збірае беларускае слова па ўсім свеце, у бібліятэцы прадстаўленыя, нават, выданні беларусаў ЗША і Канады. Менавіта з мэтай прэзентацыі свайго сайта Яраслаў і прыедзе ў Оршу.

Другі заходні беларус, якога можна будзе пабачыць у пятніцу ў нашым горадзе — Віктар Шалкевіч. Адзін з найбольш запатрабаваных выканаўцаў аўтарскай песні і вядомы артыст тэатра ды тэлебачання апошні раз выступаў у Оршы ці не ў пачатку 90-х гадоў. Яго песні моцна прасякнутыя гумарам і лірычнасцю.

Абодва госця ў гэты дзень пасля выступу ў Оршы будуць мець яшчэ і выступ у Віцебску, таму аршанская сустрэжча распачнецца а 16-00 па адрэсе вул. Камсамольская, д. 16, кв. 4. Уваход, традыцыйна, вольны для ўсіх ахвотных.

На фота: Яраслаў Іванюк

На фота: Віктар Шалкевіч.

На відэа: афіцыйны кліп Віктара Шалкевіча «Смутны беларускі блюз».