Некалькі гадоў аршанцы змагаліся за вяртанне беларускай мовы ў грамадскі транспарт горада. Аднойчы без відавочных прычын родную мову беларусаў усунулі і зрабілі ўсе абвесткі на расейскай мове. Аднак на ўсе просьбы паказаць ліст, у якім нібыта пералічваліся памылкі ў папярэднім варыянце беларускай агучкі, кіраўніцтва аўтапарку адказвала адмовай. Урэшце, ціск на аўтапарк і гарвыканкам дасягнуў такога ўзроўню, што чыноўнікі не маглі больш ігнараваць праблему — Орша засталася ледзь не апошнім горадам Беларусі, дзе прыпынкі агучваліся не на беларускай мове. У пачатку красавіка 2020 года беларуская мова вярнулася ў транспарт.
Зрэшты, пакуль не ўсе маршруты маюць агучку на беларускай мове. Паводле нашай інфармацыі, яшчэ ідзе працэс на некалькіх нумарах. У прыватнасці, аўтобусы балбасаўскага кірунку і адзін з асноўных маршрутаў Оршы — № 14 — пакуль застаюцца без беларускай мовы. Варта спадзявацца, што родная мова вернецца ў іх цягам бліжэйшых дзён.
