Інфармацыя, што нейкі прафесійнал ускрывае замкі крамаў не абсталяваных сігналізацыяй шырока абмяркоўвалася ў асяродзі прадпрымальнікаў. Невядомы лёгка ўскрываў замкі шапікаў і крамаў і забіраў усю выручку. Толькі ў асобных выпадках злачынца забіраў яшчэ і цыгарэты - паведамляе афіцыйны сайт абласной міліцыі.
Замкі вор ускрываў прафесійна, але некалькі разоў патрапляў на камеры відэа назірання. Тады следчыя звярнулі ўвагу, што мужчына ідзе на справу заўсёды ў адной і той жа вопратцы.
Колькі гандлёвых аб'ектаў ён змог абакрасці не паведамляецца, але злачынца працаваў летам і восенню даволі рэгулярна выходзячы "на працу".
Нарэшце аператыўнікі змаглі высветліць і асобу злачынцы, і чаму ён быў у аднолькавай вопратцы. Злачынцам аказаўся 58-гадовы жыхар Дуброўна, які 40 гадоў свайго жыцця правёў у турмах. Калі ён выходзіў на працу, то з Дуброўна прыязжаў на таксі ў Оршу. Тут у адным з двароў у яго быў тайнік з вопраткай - таму яна кожныраз была аднолькавай. Рэцэдывіст пераапранаўся, абкрадаў які-небудзь гандлёвы аб'ект, пераапранаўся назад і ехаў дамоў.
Нядаўна злачынца быў затрыманы.
