Тое што ўчора адбывалася ў рэгіёне смела можна параўноўваць з Хаўерам 2013 года. Кепскае надвор’е паўплывала і на аварыйную сітуацыю, і на рух транспарту і на адключэнне электрычнасці. Ратавальнікі папярэджвалі, што стыхія закране усход Віцебскай вобласці і паўночны захад Магілёўскай. То бок, па геаграфіі прагнозу наш рэгіён павінен быў стаць эпіцэнтрам непагадзі. Так і атрымалася.

Калі прагледзець ранішнія зводкі экстраных службаў, то сапраўды найбольш пацярпелі Аршанскі, Талачынскі, Сененскі раён (усходняя яго частка вакол Багушэўска) і ў некаторай ступені Віцебскі ды Гарадоцкі. Да абеду ў рэгіёне была праблема са слізкімі дарогамі, а пасля абеду пачалі падаць дрэвы, абрывацца правады. «Віцебскэнэрга» паведамляе, што да 16-00 па вобласці была адноўлена падача электрычнасці ў 28 населеных пунктаў, але колькі было абрываў не паведамляецца. Найбольш пацярпелі невялікія вёскі, але электрычнасць адключалася і ў горадзе. Напрыклад, на некаторы час ад электрычнасці быў адключаны раён Заходняй, раніцай 30-га чысла раён быў адключаны яшчэ раз, але не надоўга. Чытачы паведамляюць, што з-за адключэння электрычнасці без вады засталіся некаторыя дамы на Усходняй.

Усё гэта адбілася і на руху транспарту. Беларуская чыгунка паведаміла, што з Оршы адбыліся затрымкі пасажырскіх цягнікаў амаль ва ўсіх кірунках акрамя Орша-Смаленск і Орша-Лепель, але гэта толькі з-за таго, што тут пасажырскі рух зараз не значны. Асабліва моцна стыхія разгулялася каля Багушэўска. Мястэчка было на некаторы час адключана ад электрычнасці, дарога да яго завалена дрэвамі, некаторыя дрэвы патрапілі і на чыгунку. Пазней мы апублікуем відэа на якім бачныя проста гектары лесу пакладзенага пад ільдом.