Ілля Лабацэвіч пра якога пойдзе гаворка — жыхар Наваполацка асуджаны на 1,5 гады калоніі па абвінавачанні ў гвалце ў дачыненні да міліцыянта. 14 верасня ён з маці знаходзіўся ў цэнтры свайго горада, калі АМАПаўцы пачалі збіваць чалавека. Лабацэвіч і маці на словах заступіліся за ахвяру і тады АМАП накінуўся на іх. Ілля паспрабаваў абараніць сваю маці, што і было палічана гвалтоўнымі дзеяннямі. Само сабой, Лабацэвіч быў прызнаны палітвязнем.
Для адбыцця пакарання Ілля быў накіраваны ў Шклоўскую ПК№ 17. Апошнім часам родзічы не атрымлівалі лістоў ад зняволенага і 17 сакавіка маці паехала сама ў Шклоў, каб даведацца што з сынам, а заадно перадаць перадачу. Як высветлілася толькі па прыезду, Ілля пазбаўлены права на перадачу. За што да яго прыменена пакаранне маці не зразумела. Ёй толькі патлумачылі, што за «пад’ём» і за тое што «некуды хадзіў». Адміністрацыя калоніі — як высветлілася пазней — нават не паведаміла маці, што Ілля знаходзіцца ў лякарні — у яго ўтварыўся тромб на назе.
Паводле Правабарончага цэнтру «Вясна». На фота Ілля Лабацэвіч разам з маці.
