Каля месяца таму невядомыя ўжо спрабавалі ўзламаць акаўнт рэдактара нашага сайта Ігара Казмерчака ў тэлеграме, заадно ламалі акаўнт нашага сайта і «Цудоўнай крамы» ў інстаграм. Зламыснікам удалося літаральна на пару хвілін завалодаць кантролем над акаўнтамі і тут жа «спаліцца», выклаўшы інфармацыю ў адзін з праўладных тэлеграм-каналаў, які яўна курыруецца спец.службамі.

У ноч з 24 на 25-е сакавіка адбылася яшчэ адна атака на акаўнт Казмерчака у тэлеграме. Але атрымаць нават кароткі доступ да старонкі не атрымалася. Тады няўдалыя хакеры паспрабавалі выдаліць акаўнт, але і гэта не ўдалося.

Яўна, што дзейнасць Ігара Казмерчака найбольш мазоліць вочы ўладам у Оршы. Нагадаем, што ў канцы мінулага года на яго была распачатая чарговая крыміналка (яны на Ігара заводзяцца з перыядычнасцю раз у 4 гады), зараз асобныя службы міліцыі шукаюць магчымасць завядзення яшчэ адной крымінальнай справы — у пачатку года на допыты выклікалі шэраг набліжаных да Ігара людзей. А ў аўторак самога Казмерчака выклікалі ў следчы камітэт дзе пад распіску пра неразгалошванне бралі паказанні пра дзейнасць некалькіх рэспубліканскіх грамадскіх арганізацый.

Варта адзначыць, што ціск у нашым рэгіёне ідзе не толькі на Ігара Казмерчака. У пачатку тыдня актывізаваліся рэпрэсіі ў Дуброўна. Аднаго з актывістаў прыцягнулі да адказнасці па двух пратаколах. Міхаіла Чамурака на 25-е павесткай выклікалі даваць паказанні па яшчэ нейкай крыміналнай справе.

У самой Оршы вечарам 24-га адбыўся прынамсі адзін вобшук ва ўдзельніка пратэстнага руху. Пакуль мы не маем дастатковай інфармацыі пра гэты вобшук. Вядома, што хлопца забралі кампутар ды некаторыя іншыя электронныя гаджэты.