Орша, Грамадства

Лідары па скарачэнні насельніцтва

18.04.2021 19:13

3153 прагляду, 0 каментароў

Ва ўсім рэгіёне скарачэнне насельніцтва адно з самых моцных па краіне

Белстат апублікаваў дадзеныя па колькасці насельніцтва ў краіне. Як адзначаюць журналісты многіх сайтаў, змяньшэнне жыхароў Беларусі стала рэкордным за апошнія гады. Усяго краіна за год згубіла каля 60 тысяч чалавек.

Партал Tut.by, прааналізаваўшы дадзеныя статыстычнай службы выявіў прынамсі дзве пазіцыі ў якіх ёсць лідары па нашым рэгіёне. Па-першае, Сененскі раён адзін з лідараў па працэнту страчанага насельніцтва — тут за год колькасць людзей зменьшылася на 2,7%. Гэта 9-е месца сярод адміністратыўных адзінак краіны.

А калі лічыць не ў працэнтах, а ў абсалютных лічбах, то у 10-ку лідараў па версіі TUT.by патрапіў Аршанскі раён, бо насельніцтва за год зменьшылася на 1.757 чалавек. Можна адзначыць, што ў прынцыпе Орша і раней змяньшалася — мы былі адным з нямногіх статысячнікаў, якія паступова выміралі. На гэты ж раз нас надзіва абагналі гарады, якія ў папярэднія гады наадварот раслі: Мінск (10.347), Гомель (2.448), Віцебск (1.913)

Пазней мы апішам іншыя суседнія раёны, пакуль можам адзначыць, по змяньшаецца насельніцтва ва ўсім Аршанскім рэгіёне.