Пасля таго як родзічы памерлага ў Шклоўскай калоніі Вітольда Ашурка атрымалі яго цела, у іх з’явілася падазрэнне, што палітвязня маглі забіць. Яго галава была перабінтавана, хаця прычынай смерці адміністрацыя калоніі назвала спыненне сэрца. Следчы камітэт яшчэ да выдачы цела распачаў праверку па факце смерці Вітольда, а цяпер апублікаваў відэа якое мусіць паказаць, што траўму галавы Вітольд атрымаў не ў выніку гвалту. Праўда ад гэтага відэа пытанняў стала яшчэ больш.
Адзінае пытанне на якое дакладна адказвае відэа Следчага камітэту: чаму два тыдні ад вязня не было лістоў. Аказваецца, ён знаходзіўся ў штрафным ізалятары. Следчыя паведамляюць, што Вітольд зрабіў 12 парушэнняў рэжыму (імі ў калоніі могуць лічыцца нават не зашпіленыя гузікі) і таму быў пакараны, а ў штрафіным ізалятары лісты не дазваляюцца.
У астатнім ёсць пытанні. Па-першае, большасць відэа змантавана так, што асуджаны знаходзіцца спіной да камеры, або яго твар часткова прыкрыты медычным работнікам у форме. Толькі ў самым канцы асуджаны ляжыць тварам да камеры, але запіс «ідзе пікселямі» і быць на сто працэнтаў упэўненым, што гэта менавіта Вітольд не атрымліваецца.
Але дапусцім, што гэта сапраўды Вітольд. На відэа бачна, што ён у вельмі кепскім стане і кепска трымаецца на нагах. Вязень падыходзіць да прыбіральні і падае галавой уніз. Другі кадр паказвае ўжо кроплі крыві на падлозе, якія відавочна ішлі з разбітай галавы. Вітольду аказваюць дапамогу. Наступны кадр паказвае як Вітольд зноў ледзь стаіць на нагах і зноў падае галавой уніз на гэты раз пад лаву. Пасля гэтага яму зноў аказваюць дапамогу, але па версіі Следчага камітэту, пасля гэтага ён на стан здароўя не скардзіўся і ад шпіталізацыі адмовіўся. У сувязі з гэтым узнікае пытанне: чаму Вітольд у такім стане, што не можа трымацца на нагах і такі стан у яго адносна працяглы час? І чаму ён яўна ў кепскім стане адмовіўся ад шпіталізацыі? Пры тым, што жонка Ашурка казала, што скрагаў на здароўе ў яе мужа раней не было.
Што адбывалася паміж гэтымі падзеннямі? Колькі часу прайшло паміж першым падзеннем і другім?
Калі Вітольд падаў сам, то адкуль тады версія якую ў калоніі распавялі брату памерлага, што яго мёртвае цела ўранілі калі даставалі з лядоўні. І чаму на відэа яму перабінтоўваюць толькі верхнюю частку галавы, а родным аддалі цела з перабінтаванай амаль цалкам галавой — бачны быў толькі рот.
Ці атрымаем мы бліжэйшым часам адказы на гэтыя пытанні? Наўрад ці. Тым больш, што родзічы адмовіліся ад ускрыцця цела, бо і без таго зацягнулася пахаванне.
