Белстат падлічыў колькасць насельніцтва ў краіне і ў асобных населеных пунктах. Паводле гэтай статыстыцы, колькасць насельніцтва скарацілася яшчэ амаль на 50.000 чалавек за год і сёння складае 9.200617. Гэтыя лічбы адразу выклікалі пытанні, прынамсі, адразу панесліся абвінавачанні пра фальсіфікацыю, бо Белстат у свой час заніжаў колькасць хворых на каранавірус. А калі назіраць за ростам беларускіх дыяспараў за мяжой і дадзеных замежных статыстаў, то лічбы выехаўшых з краіны не супадаюць з дадзенымі Белстату. Хутчэй за ўсё праблема не ў фальсіфікацыі, а ў тым, што Белстат лічыць колькасць насельніцтва па "рэгістрацыях". То бок, калі чалавек зарэгістраваны па месцы жыхарства, значыць ён там і жыве. Зразумела, што калі чалавек выязжае, каб пазбегнуць рэпрэсіяў, то ён не мяняе сваю рэгістрацыю. Да таго ж, многія плануюць вяртацца пасля палітычных зменаў. Таму варта мець на ўвазе, што лічбы Белстата - афіцыйныя лічбы, якія могуць адрознівацца ад намінальных.

Увогуле нават такая статыстыка выглядае катастрафічнай, асабліва калі глядзець па рэгіёнах, бо роста насельніцтва па краіне не назіраецца вельмі даўно. Так, у Магілёўскай і Гродненскай абласцях няма ўжо і мільёна насельніцтва, а ў мінулым годзе там жыло яшчэ больш за мільён насельніцтва.

Але нас цікавіць, канешне, Аршаншчына. па ўсім раёне па стане на 1 студзеня 2023 года пражывае 142.331 чалавек. У мінулым годзе, таксама на 1 студзеня, жыло 143.725. Адпаведна, змяньшэнне амаль на 1,5 тысячы чалавек па ўсім раёне. У самой Оршы таксама адбылося змяньшэнне насельніцтва з 104.605 да 103.658. У горадзе знікла амаль тысяча чалавек, праўда, гэта дазваляе нам заставацца адзіным (акрамя абласнога цэнтра) стотысячнікам у вобласці. Бліжэйшы канкурэнт - Наваполацк, які мае 96.320. У мінулым годзе ў Наваполацку жыло 97.182. Пазней мы апішам колькасць насельніцтва ў рэгіёне.