Улады працягваюць пераслед грамадзян Беларусі за патрыятычныя лозунгі і сімволіку. Суддзя суда Аршанскага раёна і Воршы Юлія Вяршыніна 5 траўня разгледзела ў адкрытым судовым паседжанні справы аб адміністрацыйных правапарушэннях, прадугледжаных ч.1 арт.24.23 і ч.2 арт.19.11 КаАП у дачыненні да мясцовага жыхара Віталя Сытава.
Суд знайшоў, што цягам двух гадоў мужчына бесьперапынна праводзіў не дазволены ўладамі пікет і распаўсюджваў «экстрэмісцкія» матэрыялы. За гэтыя дзеі суддзя пакарала Віталя арыштам на 15 сутак і канфіскавала тэлефон, піша «Віцебская Вясна».
У працэсе суда высветлілася, што Сытаў захоўваў у адкрытым доступе з мэтай распаўсюджвання інфармацыйную прадукцыю інтэрнэт-старонкі з назвай «STOP LUKA», якая ў сакавіку 2022 года была ўключана ў рэспубліканскі спіс экстрэмісцкіх матэрыялаў.
Ён жа, у перыяд часу з лістапада 2020 г. па цяперашні час без дазволу Аршанскага райвыканкама публічнага выказвання сваіх грамадска-палітычных настрояў, прыняў удзел у пікетаванні, што выявілася ў публікацыі ў «Тэлеграм» выявы ў выглядзе палотнішча ў танах бел-чырвона-белага колеру з надпісам «ЖЫВЕ БЕЛАРУСЬ». Для гэтага правапарушэння ён выкарыстоўваў прыналежны яму тэлефон.
Гэтыя звесткі былі зафіксаваны ў рапарце оперупаўнаважанага ГУБАЗіК МУС Рэспублікі Беларусь і перададзены ў суд у выглядзе двух пратаколаў аб адміністрацыйных правапарушэннях.
