Сяргея Гняўко з Воршы афіцыйна прызналі палітычным зняволеным. Гэты статус азначае ў міжнародных інстанцыях, што крымінальная справа супраць чалавека з ім была ініцыяваная не праз парушэнне ім закону, а праз палітычны пераслед, помсту, расправу.
Гняўко атрымаў другі запар тэрмін. Ягоную справу разгледзелі ў судзе Аршанскага раёна і Воршы чацвёртага чэрвеня. Мужчыну абвінавацілі ў абразе Аляксандра Лукашэнкі (ч.2 арт. 368 КК). Справу разглядала суддзя Юлія Вяршыніна.
Першы раз Сяргея Гняўко асудзілі па гэтым жа артыкуле, але па першая яго частцы. Працэс тады адбываўся не ў Воршы, а ў судзе Кастрычніцкага раёна горада Менску 5 траўня. Прысуд невядомы, аднак у большасці выпадкаў за абразу Лукашэнкі людзей пазбаўляюць волі.
Як цяпер прынята ва ўладаў, афіцыйна імя асуджанага ў публікаваных у сеціве дакументах не прапісваецца. Але пад апісанне якраз трапляе 47-гадовы Сяргей Леанідавіч Гняўко. Ён часта ездзіў на заробкі ў расейскі Санкт-Пецярбург.
Суд «высветліў», што Сяргей Гняўко, як асоба, раней судзімая за публічную абразу Лукашэнкі і дастаўленая ў спэцізалятар Аршанскага РУУС за ўчыненне адміністрацыйнага правапарушэння, прадугледжанага арт. 19. 1 КаАП (дробнае хуліганства), нібыта «знаходзіўся ў стане алкагольнага ап’янення».
Аршанец ў прысутнасці супрацоўнікаў АУС і работніка спецізалятару нібыта «публічна вымавіў выказванне, якое змяшчае ненарматыўную форму маўленчага выказвання, у адрас Аляксандра Лукашэнкі ў сувязі з ажыццяўленнем ім сваіх паўнамоцтваў». Якія доказы гэтаму, апрача паказанняў зацікаўленых асоб (сілавікоў) былі прад’яўленыя суду — невядома, як невядома, ці былі яны.
Суд прызнаў Сяргея Гняўко вінаватым і на падставе ч.2 арт. 368 КК яму прызначана пакаранне ў выглядзе пазбаўлення волі на тэрмін 4 гады.
Па сукупнасці прысудаў да прызначанага пакарання суд часткова далучыў неадбытае пакаранне па папярэднім прысудзе і канчаткова прызначыў пакаранне ў выглядзе пазбаўлення волі на тэрмін 4 гады 6 месяцаў з адбываннем пакарання ў папраўчай калоніі ва ўмовах агульнага рэжыму.
