Ігар Ісачэнка пракіраваў раёнам крыху меньш за пяць гадоў: быў прызначаны ў жніўні 2018 года, а сыйшоў у траўні 2023. Сказаць, што ён нечым запомніўся складана. На яго час прыпалі масавыя пратэсты, якія моцна змянілі краіну і палітычныя рэпрэсіі, якія і зараз не скончыліся. Таксама на яго ж час прыпала праграма "Пад'ёма Аршаншчыны з руінаў і попелу", якая фактычна аказалася правальнай, прынамсі эканамічнага эфекту да гэтае пары не дала хаця прыцягнула ў наш горад пад мільярд даляраў. Асаблівасць Ісачэнкі была толькі ў тым, што ў адрозненні ад папярэднікаў ён мала з'яўляўся на публіцы, рэдка выступаў, а калі выступаў, то не казаў нечага запамінальнага. У прынцыпе, у гэтым няма нічога кепскага, але з-за гэтага дастаткова цяжка расказаць нешта добрае ці кепскае пра яго як пра кіраўніка.
Па вялікім рахунку, калі б не фальсіфікацыя выбараў і рэпрэсіі, то яго час мог бы запомніцца дастаткова спакойным узаемадзеяннем улады і грамадства. Ісачэнка не патрапляў у скандалы, не канфліктаваў, прынамсі, на публіку гэтыя канфлікты так і не вылезлі. Ды і прыцягненне грошай у рамках праграмы "З руінаў і попелу" хаця і не прынесла чаканага эфекта ўсё ж такі дапамагла палепшыць сацыяльную інфраструктуру: былі адрамантаваныя дамы культуры, нарэшце запусцілі бальніцу імя Сямашка і г.д.
Куды далей прызначаць Ісачэнку пакуль не вядома. Чалавек ён не стары - вясной споўнілася 54 гады і на пенсію яму пакуль рана.