Дастаткова арыгінальны суд звярнулі ўвагу журналісты выдання «Народныя навіны Віцебка». Прычым, гэты пазоў прайшоў ужо дзве інстанцыі: Аршанскі суд і Віцебскі абласны. І абодва суды прынялі адно і тое рашэнне.
Храналагічна сітуацыя выглядае так. У 2018 годзе ў Оршы пара пазнаёмілася, узнікла сімпатыя, але ў гэты час у жанчыны ўжо было дзіця. Адносіны развіваліся так хутка, што ўжо ў 2019 годзе мужчына і жанчына вырашылі пажаніцца. Пры гэтым, цалкам добраахвотна муж пагадзіўся прыняць бацькоўства над не сваім біялагічным сынам.
Здаецца ўсё ішло не так і кепска, больш за тое, жонка зацяжарыла, і пара ў тым жа 2019 годзе (праз паўгады пасля шлюбу) атрымала яшчэ і дзяўчынку. Дзяўчынка нарадзілася ў шлюбе, адпаведна, бацькоўства аўтаматычна было прызнанае за мужам.
У 2021 годзе пара разыйшлася і афіцыйна развялася. Але мужчына не чакаў далейшага развіцця падзей. Аказваецца, што мужчына мусіў плаціць аліменты. І не толькі за дачку, але за абаіх дзяцей. Адзін з іх — хлопчык — дакладна быў не яго біялагічным сынам. Праз суд жанчына дамаглася падліку сумы аліментаў за два гады — 3.206 рублёў і 66 капеек мусіў заплаціць муж па стане на 1 чэрвеня 2023 года.
Канешне, мужчына не пагадзіўся з такім рашэннем і падаў зыск у адказ. У судзе ён тлумачыў, што не згодны плаціць аліменты за хлопчыка, які нарадзіўся да шлюбу і без яго ўдзелу. А наконт дзяўчынкі ў яго ёсць сур’ёзныя сумневы, што ён з’яўляецца яе бацькам.
Дзяўчынка нарадзілася не праз 9 месяцаў, а праз 6 месяцаў пасля шлюбу. А да шлюбу — па заяве мужчыны — ягоную будучую жонку бачылі ў кампаніі іншых мужчынаў Адпаведна, ён сумняецца, што дачка ад яго і таму не хоча плаціць аліменты за абаіх дзяцей. І гэта з мужчынскага пункту гледжання дастаткова лагічна.
Жанчына са свайго боку заявіла, што, сапраўды, старэйшы сын у яе ад іншага мужчыны, але новы муж прыняў бацькоўства разам са шлюбам. Дачка, дарэчы, таксама не ад яго, што жанчына не толькі не хавала на судзе, але распавядала гэта і мужчыну яшчэ да шлюбу (прынамсі, такая версія агучана ў судзе).
Атрымліваецца, што абодва дзіцёнкі, сапраўды, не ад мужчыны. Але, не думаючы пра магчымы будучы развод, мужчына юрыдычна прызнаў абодвух дзяцей. Таму абодва суды сталі на бок жанчыны і пастанавілі, што мужчына абавязаны выплаціць запазычанасць па аліментах і ўвогуле цяпер плаціць аліменты, пакуль дзеці не вырастуць.
З юрыдычнага пункту гледжання, здаецца, усё сапраўды правільна. А як на ваш погляд, наколькі гэта правільна з пункту гледжання справядлівасці?
